Sunday, July 22, 2007

هو مفيش فايده؟؟

قعده غداء عاديه موجوده في كل بيوتنا الزوجه و الزوج و ولد و بنت في عمر الزهور
و عمر تعليم ادبيات الحياه المشتركه التي نفتقدها في حياتنا من ازمنه بعيده جدا
في اساسيات تربيتنا لافكار و سلوكيات اولادنا علشان لما يكبروا و يتجوزا
يكونوا فهمين يعني ايه حياه زوجيه مشتركه بين اتنين
الكل ياكل و يتكلم بحب و شراهه للطعام
الزوج : فين المخلل ؟
الزوجه : حاضر هاقوم اجيبه
الزوج : فين الملح و الفلفل ؟
الزوجه : حاضر هاقوم اجيبه
الزوج : مش ممكن كده مش لاقي أي حاجه انا عايزها فين بقي الكاتشب
الزوجه بزهق : اهو جانب ايدك الشمال بس انت مكسل تشوفه
الزوج : اه اهو ماشي
الابن : ماما انا عايز المعلقه بتاعتي
الزوجه : اقوم جيبها
الابن : اشمعني بابا لما طلب حاجه قمتي جيبتها اشمعني انا
الزوجه : مش عايزه اسمع صوتك عايز حاجه اقوم جيبها لنفسك اتعلم تعتمد علي نفسك
قام الابن و هو متذمر طبعا
انتهي الغداء و بيتلم الاكل و كالعاده الزوجه بتعمل كل حاجه لوحدها
الزوجه: شيل طبقك يا ولد زي اختك و اغسله كمان
الابن : اشمعني بابا مش بيعمل زينا
الزوجه: نفذ الكلام من غير مناقشه
الزوج و هو منجعص علي الكانبه المقابله للتلفزيون قعده الانتاخه بعد الاكل
و بسخريه لاذعه مغلفه باستهزاء
انا مش عارف تعب الولد كده ليه ما تسيبيه يقعد
الزوجه : بحاول اعلمه يعتمد علي نفسه و يفهم انه يساعد مادام في بيت اسره
عشان لما يكبر و يتجوز يفهم ان الحياه الزوجيه مشاركه في كل شيء
مش زي حضرتك الاي ربوك و ربوني
علي افكار متخلفه شوف الرجل الغربي بيعمل ايه مع مراته
قاطعها بنرفزه و زهق: خلاص خلاص انتي هاتديني محاضر في اصول العلاقه الزوجيه
علميه الاي انت عايزه اهو ابنك و انت حره فيه
و تركها و ادار وجهه لتلفزيون و استمر في حاله الانتاخه اليوميه العاديه
انتهي الولد مما طلبته منه امه فذهب الي ابيه و سأله
بابا حضرتك ليه مش بتعمل زينا و تساعدنا
الزوج : عشان يا حبيبي انا اتجوزت ماما و هي بتعمل عني كل حاجه
الولد : يعني يا بابا لما اكبر و اتجوز مش هاعمل حاجه و مراتي هي الاي هاتعملي حاجاتي زي ماما
الزواج : تمام
الولد : طب بقي يارب اكبر و اتجوز عشان ابطل اشيل طبقي و اغسله
الزوجه تشد شعرها من الغيظ و الفرسه من الاب و الابن و تصوت بالصوت الحياني
مفيش فايددددددده ه ه ه ه ه






Monday, July 16, 2007

خدعوك فقالوا

خدعوك فقالوا ان الحب عطاء و تضحيه علي طول الخط

هم لم يخدعوك اوي يعني؟؟؟
بس هم بالغوا اوي ي ي في التوصيف و التوضيح
الجمله ده ممكن تكون عن بعض الامهات برضه مش كلهم عشان حتي الام

ساعات لما تلاقي عيالها مش مقدرين عطاءها و تضحيتها
تبتدي تفكر في نفسها و تضعها في اولويات اهتمامها و يفقدوا اغلي و احلي عطاء في الدنيا
يعني انت عايزه تقولي ايه ؟؟؟
عايزه اقول
ان الحب في أي مرحله من مراحله هو اخذ و عطاء

و ضروري اوي اكد علي الجمله ده نعم اخذ و عطاء

عمليه تبادليه تحاول ان تكون متساويه في الفعل و رد الفعل
يعني مش ممكن واحد ياخذ علي طول الخط وواحد يعطي علي طول الخط
الاول سيتحول بالتدريج الي شخص اناني لا يفكر الا في نفسه و ينسي الطرف الاخر

و تنقلب الحكايه من حب الي حب الذات فقط و كيفيه استغلاله للطرف الثاني في ارضاء نفسه و متعته فقط
اما الثاني لا يمكن يستمر يعطي فقط دون ان باخذ هيزهق
هايفكر بينه و بين نفسه امال انا فين و فين الاهتمام بي و فين المشاعر الاي زي بتاعتي
هو مش بيسعدني زي مانا بسعده هو مش بيفكر فيي زي ما بفكر فيه
و يبتدي الشك و الحيره و الغضب يدخلوا قلبه من هنا بدايه النهايه ممكن الانفصال

او حتي تكون عيشه و السلام و يعشش في بيوتهم الصمت الرهيب المتبادل

و القلوب الاي اتفقلت بيدهم امام بعضهم
يعني لازم زي ما تعطي تاخد مش لازم يكون مساوي له

بس علي الاقل يكون مقارب لنفس مقدار العطاء او الاخذ

لن المعطي هايجي عليه وقت يبحث عن نفسه داخل الاخذ ان لم يجد شيء سيهرب

و يقرر انهاء العلاقه تماما او علي الاقل لن يستمر في الاعطاء و يتحول الي النقيض

و يبقي بخيل حتي في كلامه
يعني قبل ما تحب او تخطب او تتجوز لازم تفهم ان المشاعر و المواقف اخذ و عطاء
و ماتتوهمش بكلام ان الحب تضحيه و عطاء علي طول الخط ده كلام افلام مش الحقيقه و الواقع و بيخليش البيوت عمرناه عطاء اصلا
طب مين اكتر في العطاء الست و لا الرجل ؟
جوابي
هو ان الموضوع كله يرجع لشخصيه الانسان سواء كان رجل او ست

يعني احيانا نجد رجال عطاءهم يفوق الكثير من النساء و لكن بحكم ان العاطفه اكثر وضوحا في المراه

فاعتقد انها بعض الاحيان تكون الاغزر في العطاء نظرا لعاطفه الامومه الطبيعيه في عطاءها الدائم
و لكني دائما افرق بين الأم و الزوجه او الحبيبه لان المشاعر هنا مختلفه و الطرف الاخر مختلف

فالابن لا يمكن الانفصال عنه او الاستغناء او تغيره

بعكس الحبيب او الزوج فالانفصال وارد في علاقتهما

و لكن برغم ذلك اؤكد علي فكرتي الثابته بعض الشيء ان الموضوع كله يرجع الي الشخصيه
واخر شيء بقي اوعي اوعي تحب او تتجوز من غير ما تفهم ان
الحب و الزواج يجب ان يتوافر فيه عملياتي العطاء و الاخذ

علي حد السواء و في نفس واحد كمان

Monday, June 25, 2007

بدايه لابد منها


طبعا انا عارفه ان عنوان المدونه يدي معني الاضراب عن الزواج ده غير صحيح !!!!!
فانا الحمد لله متزوجه و عرفه قيمه هذا الارتباط المقدس بس الفكره اني وجدت في حياتي و تجارب الاخرين التي اعشق التأمل في هذه التجارب الانسانيه كم هائل من المشاكل و الظروف التي تدفعني لاكتب عن هذا الموضوع و هو ان يجب ان نفكر جيدا و ندرك كويس جدا هذه الخطوه المهمه جدا في حياتنا و اكتشفت مدي الصعوبه التي نجدها لنتعامل مع الطرف الاخر من الزواج سواء كان رجل او امراه ووجدت اننا يجب ان نتأمل قليلا انفسنا و نقف امام اخطأنا تجاه الطرف الاخر ووجدت ايضاء اننا يجب ان نفهم نفوس بعض اكثر من ذلك فالزواج من وجهه نظري هي اجتماع طرفين علي الحب و السعاده و ليس التعاسه و ان كانت التعاسه و الضيق سكنت في كثير من بيوتنا و قلوبنا و ساحاول نعم ساحاول ان اكون عادله لن اخذ رأي المرآه لاني مثلها او رأي الرجل عشان يقتنع بي انا هاخذ جانب العقل و الحق اولا ساحاول طرح المشاكل و محاولات للحل و عرض الكثير من المواقف السئيه و الجيده لمحاوله التعلم من اخطأنا و استعاده ذاكره السعاده في قلوبنا سواء كنا نحب او مخطوبين او متزوجين فلقد مررت بثلاث المراحل هذه و عرفت كم المعاناه فيها و ايضاء كم السعاده فيها ايضاء
هي محاوله لفهم الذات و فهم الطرف الاخر للوصول للهدف الاسمي و هي السعاده و الرضا التام عن حياتنا مع من نشارك حياته
فهي ليست دعوه لعدم الزواج بل دعوه لفهم أنفسنا و دعوه لاستعاده السعادة المفقودة في قلوبنا و بيوتنا